Main                                      People                                  Poetry

 


قصيدة .. يا ست الكل

طارق المملوك

يا ست الكل

يا ست الكل يا بلادى .. يا موالى .. يا أعيادى
يا ست الكل متشوق .. أشوف الكون بيتزوق
ويهديلك تيجان الفل .. واجريلك يا ست الكل
واغنيلك يا فوق الكل .. واحلملك بحدوته
وافرحلك بزغروده .. وألفلك .. وأكتبلك  
قصيدة عشق مظبوطه .. يا ست الكل يا بلادى

.....

يا نهر النيل يا متراضى .. وشايل خير ماهوش راضى
يجي ويلف ع الفاضى .. ولا يقابل جبين أسمر
يمحى عتمة الماضى .. يطوف الارض يحييها
ويكسيها بلون أ خضر .. وتهادى عيدان الفل
وأفرحلك يا ست الكل

.....

يا بستانى .. يا بستانى
تعود الحلوة من تانى .. على عرش الامل تقعد
وتيجى الحلوة بالطرحة .. تقوم الدنيا تتفرج
أضمك وأتملى فرحة .. وأهديلك تيجان الفل
وأفرحلك يا ست الكل

.....

يا روح الروح يا متغرب .. يا متباعد .. يا متقرب
بطعم العزة متشرب .. تعالى نغنى موالنا .. كلام مصري .. ومتعرب
زمان العزة يا بلادى .. أكيد قرب
كلام أمثالنا متجرب .. تعود الفرحة ما بينا  ..ونهديها تيجان الفل
ونفرحلك يا ست الكل

.....

يا كحك العيد يا متشوق .. بطعم الحلو متزوق
على لسانك يكون سكر .. ويندهلك .. ويتشكر
ويهديلك .. ف يوم عيدك  ..
عيدان الورد والنرجس .. ويهديلك تيجان الفل
ويفرحلك يا ست الكل

.....

يا أزهر نادى .. واتحرر
وصليلنا .. وادعيلنا .. نكون من جوه زى بره
كما بنظهر .. نقوم نقدر
ننادى ف وش سجانا .. ونتحرر
ومن إيدك .. نوديكى
على أرض الأمل أخضر .. نعود من تانى ونكبر
يفوق القدس يتحرر .. ويهديلك تيجان الفل
ويهنيكى يا ست الكل


يا روح الروح يا موالى .. يا أعيادى

يا ست الكل يا بلادى

 

طارق المملوك

2 يناير 2006م

منقول عن موقع دردشة

dardasha@yahoogroups.com
 

 


 


حلم الغلابة

بلدنا بخيرها .. معدش يراضينا

بناكل ونشرب .. وجوعنا ساكنا

لا أكلة بتكفى .. ولا بق ميه

ونيلنا محاوطنا .. لكنا عطاشى

بناكل مسرطن .. يا زرعه لغيرنا

ونشرب معكر .. ونيلنا ما بينا

بيجري لغيرنا  

لأنه ف بلدنا صبحنا وصرنا

سادة وعبيد

كبارها بياكلوا ضميرها ومصيرها

بياكلوا الحديد

وزادوا العبيد .. هياكل عجاف

سكتنا بنبكى .. سهرنا نخاف

على بكرة ألعن هايجى أكيد

مادمنا بناكل مسرطن يموت

وحتى ف موتنا نموت بالبطئ

وموتنا يعذب .. لكنه صديق

يريح تعبنا .. وينهى الحكاية

رضينا بموتنا .. وصمت الغلابة

ويخرس غضبنا .. ويخلص زعلنا

وده مش مريح أكيد الديابة

بتنهش عضامنا ..  مزاجها تاعبها

سكاتنا يضايق

مزاجه ف خناقه .. تظبط دماغه

يقولك ما تصرخ .. ويقطع لسانك    

وتيجى تفكر .. فيكسر دماغك

واحنا الغلابة .. عيونا بصيرة

وإيدنا قصيرة .. عشيتنا كآبه

رضينا بحلم جدودنا الغلابة

فنرجع و نحلم .. كأنا زمان

زمان لما خيرنا .. يشبع بطونا  

وتاكل معانا بطون الآلاف

وعاشوا جدودنا سنين ف الأمان

وجاتهم مجاعه سنين العجاف

ويحلم سادتهم برمز الحكاية

ناموا و شافوا.. لا فهموا .. لا عرفوا

ولا حتى خافوا

يموت الغلابة .. عبيد السياده  

وهما يعيشوا .. وتبقى النهاية

ويجي المفسر .. رسول الإله

يفسر وينقذ

ويزرع .. يخضر .. بإيد الغلابه

وتيجى النجاه

مصيرنا بإيدينا .. وحلم النهاية السعيدة يجينا

أكيد مش ناقصله إلا عملنا

ويومها هايجى زمان النجاه


طارق المملوك

28 نوفمبر 2005م


منقول عن موقع دردشة

dardasha@yahoogroups.com

 


 


قلب وعاش


دقة جديدة .. بتحيي القلب اللى خلاص مات ..

بعد الهجر.. وبعد العمر ماعدى وفات ..

جاية تقول القلب اتعلق وخلاص داب..

بعد غياب..

لا ده حرام.. اظن كفايه عذاب واهات..

قلبى ومات .. عمرى وفات ..

وجايه تقولى بيوتنا قريبة ..

والشباك اللى باشوف منه حيطان صامته ..

بقى قدامه كمان شباك ..

مافتش الوقت .. مادمت لحقت .. اخر دقه ..

واخر نبضه ف قلب الحب ..

ايوة لحقتك قبل الموت ..

ايوة بحبك كانت جوا ف قلبى سكوت ..

عمر ما ماتت .. ولا يوم عرفت معنى الموت ..

تهت وضعت .. قوام فكرت ..

هو القلب صحيح بيموت ..

تهت ف ثانية ورجع الصوت

ويموت ليه؟ .. وعشان ايه؟ ..

اذا كان لازم يبقى نموت كلنا وياه ..

وبعد القلب دى تبقى حياه؟ ..

قمت جريت من جدران حبسانى بعيد .. وع الشبابيك..

افتح قلبى لاحلى حبيب ..

اكتب اسمك وسط شوارع عرفت حبك ..

تفرح بيك ..

وسط كلام كتبته احلامى .. ياخدنى لحدك واكون ليك ..

رغم الصعب ..

ورغم الرعب من اللى انا شايفه لكل حبيب ..

رغم جروح سيبانى ف حالى بقالها زمان ..

كسب الحب .. وهابقى انا ليك ..


طارق المملوك

18 يناير 2006م

منقول عن موقع دردشة

dardasha@yahoogroups.com
 

 

 آدى مصرنا / قصيدة لطارق المملوك

آدى مصرنا
احلى مسا .. احلى صباح ..
على عمنا .. ابو النجوم ..
على مصرنا .. على امنا .. على حضننا .. المليان
براح ..
آدى مصرنا ..
تقع .. تقف .. تاكل .. تصوم ..
ويعدى يوم .. من غير نجوم ..
ناكل هموم من غير غموس ..
وتانى يوم .. تشرق هناك ..
شمس الشموس ..
مصر دى .. يا عمنا .. بلد الطحين .. بلد الغلابة
..و المطحونين ..
و ناس صعايدة .. واقفين ينادوا.. ع الفلاحين ..
وهناك بديوى .. واقف عريس ..
وزمان خديوى .. جاب الرئيس ..
صياد وقارب .. وسارى عالى ..
رزق و جالى .. مالى الشبك ..
اكله الوزير .. يغلى السمك ..
جاب المراكب .. ويا المواكب ..
اسطول كبير .. لف البلاد ..
صاد القروش .. ظهرت كروش ..
جاعوا الولاد ..
مصر البليلة .. طبق العاشورا ..
فول بالطحينة .. وزيته حار ..
كشرى .. وبصارة .. ملوخية ناشفه ..
وناس غلابة .. وناس مناكفه ..
شاى بالحليب .. ينسون .. وسحلب ..
قامت الحكومة .. عملاله مقلب ..
حلبه و حصى .. ومعاها شيشه ..
نملى بجردل .. نمسح بخيشة ..
عيشتنا يمكن تكون بسيطة ..
عقولنا جايز تكون عبيطة ..
لكن المؤكد ان احنا لسه ..
على الخريطة ..
مصر السواقى .. وقناية سارحه ..
نملى ونغسل .. بلاص و طرحة .. مصر الهويس .. تبن
و دريس .. السد عالى .. و
النيل نجاشى .. النخل طارح .. فوق ف العلالى ..
ترعة تنادى .. ارضي الشراقى ..
تزرع وتقلع .. تصبح .. تلاقى ..
بقرة و حليب .. وفراخ تبيض ..
وزبده سايحة .. تاكل بغاشه ..
من غير لا باشا .. ولا مد ايد ..
اصل البلد دى .. سابوها لينا ..
ماصبحش سيد مالك عبيد ..
مصر المقام .. و لسان فصيح ..
حمام مرفرف .. على الضريح ..
مدد يا طاهرة .. يا ام هاشم .. شيلاه يا بدوى
.. قال للحسين .. قيموا الموالد .. هاتوا البيارق ..
درس العلوم .. دنيا و دين ..
فينها النفيسة .. و الست عيشة ..
مدد يا زينة البيت يا طاهرة ..
ادينى وعدى .. تقوم مظاهرة .. ضد الافاعى .. فينه
الرفاعى .. قرب لليثى ..
شيلاه يا شافعى .. تشفيلى عينى ..
اصل البلد دى ..عماها حيسي ..
مصر المساجد .. راكع .. و ساجد .. محمل وطلعه ..
وحسين .. وماجد .. رمضان صيامنا .. وعيد ميلاد ..
فانوس وزينة .. فرحة ولاد .. وفلوس عيدية .. خاتمة
و ضحية .. كحك ف مارينا .. اخوه ف بولاق ..
وديك و رومى .. بط و رقاق .. فرحة لربيعنا ..
شم النسيم ..
فلوس كتيرة .. وحالة جيم ..
فسيخ و رنجه .. بيكيد بطارخ ..
والكل طابخ .. و الاكله لمه ..
وناس جعانه ..اخرتها شمه ..
مصر التنابله .. و مسطولين .. وناس بتبدع .. فن ..
واصيل .. مصر وولادها .. محفوظ .. حكيم ..
و عمرو موسى .. واحمد زويل ..
ادريس وناجى .. مختار ينادى .. على النديم .. وست
ثومة .. جايه تسلطن ..عبد الحليم .. وعم بيرم ..
بديع و خيرى ..
زغلول زعيمنا .. درويشنا سيد ..
نقوم .. نقيد .. اسامى تكتر ..
سكينة .. ريا .. سفاح بيقتل ..
ووالى خاين .. دخان بيسطل ..
مركب .. سفينة .. والبر ضايع .. و الكل فيها
..كوكتيل طبايع .. وناس معاها .. فلوس وياما ..
وناس عملها ..سبع صنايع ..
الكل فيها .. عنده استمارة ..
روتين بيخنق ..ختم .. ووزاره ..
وناس وشوشها بتبقى عكرة ..
وناس وشوشها ورود تسر ..
وناس بتشرب .. ازازة ساقعة ..
وناس شرابها .. حنضل .. ومر ..
وناس ركوبها .. اوتومبيلات ..
تمساحة جايز .. وخنزيرات ..
وناس اخرها .. ركوبها فزبه ..
وناس بتحضن ف اوتوبيسات ..
وناس بتلبس .. عمه و جبه ..
وناس بدلها .. بالدولارات ..
عيون بسيطة .. عيون جرئية ..
مصر الغلابة ..
جحر الديابة ..
مليون عصابه ..
عرفت يابابا .. كل الحقيقة ..
يوم ننكسر .. و نقوم نشب ..
وبعدين نقف .. نستنى يوم ..
يمكن نقب ..


طارق المملوك
21/5/2006